Dewch i ymweld â ni y gaeaf hwn i weld Azadi, arddangosfa gan yr artist Naz Syed o Ziba Creative sy’n dathlu cymuned a diwylliant a threftadaeth Bersiaidd drwy bompomau prydferth o undod, diolchgarwch a gobaith o bedwar ban byd.

Artist gweledol cymdeithasol Cymreig ac Iranaidd yw Naz. Mae hi’n frwdfrydig dros grefftiaeth, cymuned a lledaenu caredigrwydd drwy greadigrwydd.

Archwiliwch blât ffrwythau wedi’i greu o bompomau lle y gallwch chi ddathlu bywyd llawn lliw a llawenydd fe than o’r ŵyl Bersiaidd Shab-e Yalda. ‘Noson Yalda’ yw’r noson hiraf a thywyllaf (ystyr Yaldā yw aileni’r haul) ac mae’n ddathliad o fuddugoliaeth goleuni ar dywyllwch.

Yn ystod Shab-e Yalda mae trawsnewid yn digwydd – mae’r aros ar ben, mae goleuni yn disgleirio ac mae daioni yn teyrnasu. Caiff ffrwythau a chnau eu bwyta, ac mae pomgranadau a melonau dŵr yn arwyddocaol iawn. Mae lliw coch y ffrwythau hyn yn symboleiddio arlliwiau rhuddgoch y wawr a golau bywyd.

Mae rhan o’r arddangosfa yn cysylltu â phatrymau a golau hudol saernïaeth Iranaidd, a ysbrydolwyd gan y Mosg Nasir-Ol Molk yn Shiraz, Iran, sy’n cael ei alw y mosg enfys/pinc, ac sy’n dod yn fyw gyda golau’r haul mewn caleidosgop o liwiau sy’n cael eu hadlewyrchu drwy’r patrymau mosaig prydferth. Crëwyd gan Naz mewn cydweithrediad â Kate Verity a’r gymuned.

Mae marwolaeth Jina Mahsa Amini wedi sbarduno ton o wrthwynebiad yn Iran. Ar ôl cael ei hysbrydoli gan y gwrthryfel yn Iran, mae Naz wedi creu portread o Mahsa mewn cydweithrediad â Consumersmith a chaiff ei chynrychioli o fewn y wal pompomau.

Mae croeso i chi ychwanegu eich pompom eich hun ynghyd â negeseuon o obaith, undod a chefnogaeth i bobl Iran sy’n dioddef anghyfiawnder ac yn ymladd dros eu rhyddid a’r menywod sy’n protestio dros hawliau dynol sylfaenol ac yn rhoi eu bywydau mewn perygl wrth wneud hynny.

Cofiwch ymweld â’n llwybr hefyd lle y gallwch chi brofi pob math o grefftiaeth a chreadigrwydd gan gynnwys pompomau protest, pompom cymunedol enfawr, wal undod a gallwch chi hyd yn oed wisgo clogyn carped hud wedi’i greu o bompomau!

DIGWYDDIAD YALDA

Ar 18 Rhagfyr bydd digwyddiad Yalda yn ardal y Glanfa rhwng 4pm a 7pm gyda cherddoriaeth fyw, DJ cerddoriaeth ffync Persiaidd, geiriau llafar, gweithdy crefftiaeth, sioe ffasiwn a mwy.

DEWCH I YMUNO Â GWEITHDY!

Yn ystod mis Rhagfyr a mis Ionawr bydd Naz yn cynnal gweithdai pompom. Mae sawl ffordd y gallwch chi gymryd rhan:

• Ychwanegu at y pompom cymunedol enfawr fel ei fod yn dal i dyfu
• Creu eich pompom eich hun ac ychwanegu neges o gefnogaeth i Iran a fydd yn cael ei ychwanegu at y wal undod
• Creu eich pompom protest eich hun ac ychwanegu baner fach i godi ymwybyddiaeth o Chwyldro Iran

Bydd popeth a grëwch yn adeiladu ar y cyd dros gyfnod y gosodwaith.

Hefyd bydd gweithdai baneri creadigol gydag Art Clwb er mwyn helpu i gefnogi’r protestiadau sy’n digwydd yng Nghaerdydd dros Iran, yn addas i bawb 7+ oed.

Os oes gennych unrhyw wlân yr hoffech ei gyfrannu at y prosiect i’w helpu i barhau i dyfu, neu os hoffech chi gymryd rhan a chael gwybod mwy, cysylltwch â: naz@zibacreative.co.uk.