Ymunwch â rhai o actorion Pobol y Cwm, gan gynnwys Jonathon Nefydd (Colin), Sera Cracroft (Eileen) a Dyfan Rees (Iolo) ar gyfer taith y tu ôl i’r llen o Gwmderi yng nghanolfan BBC Studios Cymru, Porth Teigr. Bydd actorion gwahanol yn tywys y teithiau bob dydd.

Pobol y Cwm yw opera sebon deledu hyna’r BBC. Mi gafodd hi ei darlledu gyntaf, 16 Hydref 1974.

Mae’r stiwdio fel arfer ar gau i’r cyhoedd, ac fel rhan o ddathliadau pen-blwydd mawr Pobol y Cwm yn 50, mae BBC Cymru yn agor y drysau am gyfnod byr.

Bydd cyfle arbennig i chi weld y setiau mewnol eiconig ac ymweld â’r stryd fawr adnabyddus, gan roi cipolwg ar y cynhyrchiad o du ôl y camera.

Mae’r teithiau dwyieithog yn gyfle i ddilyn ôl troed y cymeriadau a gweld yr union fannau lle mae’r caru a’r cecru, a’r chwerthin a’r dagrau yn digwydd.

Cynhelir teithiau gydag chyfieithiad Iaith Arwyddion Prydain (BSL) fore Sul, Hydref 13 am 9.45am a 11.45am.

PETHAU I’W COFIO CYN CYCHWYN

Darllenwch y wybodaeth bwysig isod, os gwelwch yn dda, cyn archebu eich tocyn(nau).

• Mae’r teithiau yn addas ar gyfer plant dros 7 oed. Bydd rhaid i oedolion ddangos cerdyn adnabod gyda llun cyn cael mynediad i’r stiwdio (naill ai pasbort, trwydded yrru neu gerdyn teithio).
  
  
• Fe ganiateir bagiau bach sy’n cynnwys bagiau llaw (o dan 40cm x 35cm x 19cm – tua maint A3). Ond ni fydd modd i chi ddod â bagiau cefn, na bagiau mawr sy’n cynnwys bagiau siopa. Noder os gwelwch yn dda, nad oes lle i gadw unrhyw fagiau yn yr adeilad.
  
  
• Bydd angen i chi gyrraedd 15 munud cyn y daith oherwydd mesurau diogelwch. Bydd gwesteion a’u bagiau yn cael eu harchwilio. Mae’r daith yn para dros awr, yn cynnwys tipyn o gerdded a sefyll ac yn addas ar gyfer cadeiriau olwyn.
  
  
• Mae’r BBC yn cadw’r hawl i ganslo teithiau am resymau gweithredol ac yn yr amgylchiadau yma ni allwn gynnig dyddiadau eraill.
• Rhaid i bob plentyn dan 16 oed gael tocyn a bod yng nghwmni oedolyn neu fel arall ni chaniateir mynediad iddynt.