Wyt ti erioed wedi dyfalu sut beth yw dod â chynhyrchiad theatr yn fyw?
Tu hwnt i’r actorion a’r sgript mae byd o fanylion cywrain ac arbenigedd technegol. Mae ein cwrs cynhwysfawr Gwneuthurwyr Theatr: Tu Ôl i’r Llen wedi’i gynllunio i ddatgelu’r hud sy’n digwydd gefn llwyfan. P’un a wyt ti’n weithiwr theatr proffesiynol awyddus neu’n berson brwdfrydig a chwilfrydig, bydd y cwrs yma yn rhoi’r wybodaeth a’r sgiliau i ti i ddeall a chyfrannu at fyd cyfareddol cynhyrchu theatr, gyda ffocws penodol ar sain a goleuo.
Trosolwg o’r Cwrs
Yn y cwrs ymdrochol yma byddi di’n:
– Magu dealltwriaeth sylfaenol o egwyddorion sain a goleuo, sy’n hanfodol ar gyfer creu’r awyrgylch cywir ar gyfer unrhyw gynhyrchiad.
– Cymryd rhan mewn gweithdai ymarferol sy’n cwmpasu popeth o osod cyfarpar i gyflawni perfformiad byw.
– Dysgu sut i weithredu cyfarpar sain a goleuo safonol y diwydiant, gan gynnwys consolau, microffonau, gosodion goleuo a mwy.
– Archwilio ochr artistig dylunio sain a goleuadau, gan ddeall sut i uwchraddio adrodd straeon drwy elfennau technegol.
– Datblygu sgiliau meddwl yn feirniadol a datrys problemau i ddelio â’r heriau dynamig sy’n codi yn ystod perfformiad byw.
Pam dewis y cwrs yma?
- Hyfforddwyr arbenigol: Caiff ein cwrs ei arwain gan dechnegwyr proffesiynol yng Nghanolfan Mileniwm Cymru sydd â blynyddoedd o brofiad yn y diwydiant theatr.
- Dysgu rhyngweithiol: Byddi di’n cael budd o gyfuniad o wersi damcaniaethol a sesiynau ymarferol, gan sicrhau profiad dysgu cyflawn.
- Cyfleoedd rhwydweithio: Byddi di’n cysylltu ag unigolion tebyg ac arbenigwyr yn y diwydiant, gan agor drysau i gydweithredu a chyfleoedd gyrfa yn y dyfodol.
Ar gyfer pwy mae’r cwrs?
Pobl greadigol ifanc rhwng 14 a 25 oed sy’n:
- Dechnegwyr a gwneuthurwyr theatr awyddus: Os wyt ti eisiau dechrau gyrfa mewn cynhyrchu theatr, mae’r cwrs yma yn rhoi’r sgiliau a gwybodaeth hanfodol sydd eu hangen arnat ti.
- Frwdfrydig dros theatr: Byddi di’n datblygu gwerthfawrogiad dyfnach o theatr drwy ddeall y gwaith sy’n rhan o bob cynhyrchiad tu ôl i’r llen.
Pryd mae'r cwrs?
Cynhelir y cwrs bob dydd Llun, 6pm – 8pm am bum wythnos o 20 Ionawr i 17 Chwefror.
SUT YDW I’N ARCHEBU?
Archebwch eich lle drwy glicio ar y botwm archebu ar y dudalen yma. Gwnewch yn siŵr y gallwch chi ddod i bob sesiwn o’r cwrs dros y pum wythnos.
Os yw’r cwrs yma wedi gwerthu allan, ychwanegwch eich manylion at ein rhestr aros a byddwn ni’n cysylltu â chi os bydd lle ar gael.
Beth os oes angen cymorth ychwanegol arna i neu mae gen i anghenion hygyrchedd?
Rydyn ni’n ymrwymedig i gefnogi pobl ifanc B/byddar, anabl a niwroamrywiol neu sydd â chyflyrau meddygol, gofynion hygyrchedd neu unrhyw brofiad byw lle gall fod angen addasiadau, cefnogaeth neu sensitifrwydd.
Os hoffet ti drafod sut y gallwn ni dy gefnogi di neu os oes gennyt unrhyw gwestiynau, e-bostia platfform@wmc.org.uk
EIN CYRSIAU PLATFFORM
Rhaglen hyfforddi unigryw yw Platfform sy’n cynnig llwyfan i bobl ifanc archwilio eu diddordebau, mynegi eu hunain, meithrin hyder creadigol a rhannu eu naratif drwy ddysgu ymarferol.
Caiff y gweithgaredd yma ei ariannu gan Sefydliad Moondance, Sefydliad Garfield Weston, Ymddiriedolaeth Elusennol Simon Gibson ac Ymddiriedolaeth Elusennol Mary Homfray.
