Drysau'n agor: 7.30pm | Amser dechrau: 8pm
Yn dod â phedwar artist sy’n gwthio ffiniau ynghyd – un o Gymru, Lloegr, Gogledd Iwerddon a’r Alban – comisiwn newydd yw Poesis a gafodd ei greu o’r rhaglen datblygu doniau lwyddiannus Take Five dan arweiniad Serious.
Yn y cydweithrediad unigryw yma, mae’r artistiaid yn gwau themâu cydgysylltiad, ffiniau ac iaith fel trothwyon. Gyda seinweddau byw, fersiynau newydd o ganeuon gwerin traddodiadol, alawon byrfyfyr a lleisiau wedi’u trin, mae’r perfformiad yn pylu’r llinellau rhwng y gorffennol a’r presennol, lle a chanfyddiadau.
Lein-yp
Lulu Manning
Artist a chyfansoddwr yw Lulu Manning a gafodd ei geni yng Nglasgow ac sydd bellach yn byw yn Llundain. Mae’n aml yn ysgrifennu cerddoriaeth araf sy’n cynnig lle i’r gwrandawyr leoli eu hunain yn y gwaith. Cerddoriaeth sy’n newid mewn ffyrdd ysgafn ac sy’n gwahodd hunanholi. Mae Lulu yn mwynhau archwilio gweadedd gwahanol sain; gan osod prosesau ymddatod a thrawsgyweirio tu blaen fel nodweddion allweddol o’i gwaith.
Cafodd blynyddoedd ffurfiannol Lulu ei ffurfio drwy dyfu i fyny yng Nglasgow ymhlith creadigrwydd brwd ac ethos DIY’r ddinas. Symudodd i Lundain i astudio jazz a cherddoriaeth fyrfyfyr, a thrwythodd y profiad cefndir yma ei gwaith diweddar mewn cyfansoddi arbrofol a sain amgylchynol.
Y llynedd, cafodd ei gwaith cyfansoddi ei berfformio yn Amgueddfa V&A Llundain yn y gwaith amlddisgyblaethol ‘Queering The Mind; Releasing The Body’. Cyfansoddodd y sgôr ar gyfer Sioe Ffasiwn S/S ’25 Loverboy yn Somerset House yn Llundain a chyrhaeddodd restr fer y wobr Cyfansoddi Jazz gan yr Arts Foundation yn 2024.
Xhosa Cole
Mae Xhosa Cole yn un o sêr datblygol y byd jazz Prydeinig. Ar ôl ennill gwobr BBC Young Jazz Musician of the Year yn 2018, aeth Xhosa ymlaen i ennill nifer o wobrau eraill ac ymddangos ar y llwyfan ochr yn ochr â pherfformwyr mawr jazz.
Mae diddordeb Xhosa mewn chwaraewyr o ystod o draddodiadau gwahanol, ynghyd â’i gysylltiad cryf â’i gymuned ym Mirmingham, wedi helpu i ddatblygu llais unigryw ac annibynnol ffyrnig.
Claire Victoria Roberts
Cyfansoddwr, cantores a feiolinydd yw Claire Victoria Roberts, sy’n pylu ffiniau genres jazz, clasurol a gwerin. Mae’r artist o Gymru yn defnyddio ei dylanwadau amrywiol drwy leisio byrfyfyr, cerddoriaeth ffidil Geltaidd ac arddulliau jazz a chlasurol telynegol.
Conor McAuley
Mae’r drymiwr a threfnydd byrfyfyr o Felfast Conor McAuley yn un o dri aelod Córas Trio, sy’n rhan o don greadigol newydd o gerddorion ym Melfast sy’n archwilio sut mae cerddoriaeth draddodiadol yn gysylltiedig â phrofiad yr 21ain ganrif. Gan herio syniadau am buryddiaeth ddiwylliannol, maen nhw’n sgubo llinellau arferion cerddorol cyfoes, yn ddi-ofn ac anymddiheurol wrth iddyn nhw archwilio syniadau newydd.
Canllaw oed: 8+ (dim plant o dan 2 oed)
Rhaid i bob plentyn dan 16 oed eistedd gydag oedolyn 18 oed neu’n hŷn
O dan 30
Gostyngiad o £3
Cynnig tocynnau
Prynwch docynnau ar gyfer 2 ddigwyddiad Llais i arbed 10%.
Prynwch docynnau ar gyfer 3 digwyddiad Llais i arbed 15%.
I fanteisio ar y cynnig ar-lein, rhaid i nifer y tocynnau ar gyfer pob digwyddiad fod yr un peth. Caiff y cynnig ei ychwanegu at eich basged. Nid yw’r cynnig yma yn cynnwys y Wobr Gerddoriaeth Gymreig, BBC Canwyr y Byd Caerdydd: Dathliad na Ceci est mon coeur.
Mae pob cynnig yn amodol ar ddyraniadau ac argaeledd.
