Mae’r profiad yma’n rhan o Wobr Annwn, gwobr fyd-eang newydd sy’n dathlu straeon ymdrochol gan artistiaid o bob cwr o’r byd. Wedi’u henwebu gan gymuned ryngwladol o guradwyr a sylwebwyr, mae pedwar darn o waith y rhestr fer yn dod i Ganolfan Mileniwm Cymru, gan eich gwahodd i gamu i mewn i’r stori. Pedwar byd, un lleoliad.

“I gynnig gweledigaeth o’r dyfodol a dealltwriaeth well o’r rolau y gallen ni ei chwarae ynddo” – Karen Palmer

Mae Consensus Gentium – ymadrodd Lladin sy’n golygu “os mae pawb yn ei gredu, rhaid iddo fod yn wir” – yn brofiad rhyngweithiol sy’n bwriadu sbarduno trafodaethau am breifatrwydd data, rhagfarnau diarwybod a phŵer technoleg.

Mae’r ffilm ryngweithiol yma yn eich gwahodd i wneud penderfyniadau sy’n helpu i lywio’r stori ei hun. Gan ymgorffori technoleg canfod wynebau a Deallusrwydd Artiffisial, caiff cynulleidfaoedd eu cludo ar chwilfa unigryw i ddarganfod beth allai ddigwydd be baen ni’n ildio i wyliadwriaeth heb wiriadau. Drwy brofiad yn seiliedig ar ffôn clyfar, mae cyfranogwyr yn camu i mewn i rôl rhywun sy’n gobeithio ymweld â’u mam-gu sy’n sâl, gan ddefnyddio Ap Dinesydd Byd-Eang wedi’i redeg gan y llywodraeth sy’n penderfynu statws symudedd drwy fonitro cyson. Gan ddefnyddio technoleg canfod wynebau a Deallusrwydd Artiffisial, mae’r ffilm yn darllen eich mynegiadau a’ch penderfyniadau mewn amser go iawn, gan greu taith unigryw a phersonol sy’n datgelu sut y gall systemau digidol ddylanwadu ar, neu gyfyngu ar, ryddid personol.

Gwnaeth y pwyllgor dewis ganmol ei naratif emosiynol wedi’i arwain gan y cyfranogwr sy’n archwilio dinasyddiaeth ddigidol, galluedd a goruchwyliaeth mewn ffordd bwerus – lle mae pob dewis gan y cyfranogwr yn adlewyrchu cwestiynau brys am ein dyfodol cysylltiedig.