Mae’r profiad yma’n rhan o Wobr Annwn, gwobr fyd-eang newydd sy’n dathlu straeon ymdrochol gan artistiaid o bob cwr o’r byd. Wedi’u henwebu gan gymuned ryngwladol o guradwyr a sylwebwyr, mae pedwar darn o waith y rhestr fer yn dod i Ganolfan Mileniwm Cymru, gan eich gwahodd i gamu i mewn i’r stori. Pedwar byd, un lleoliad.

Camwch i mewn i dywyllwch llwyr a dewch yn ganolbwynt cytser sy’n symud.

Mae NOWISWHENWEARE (the stars) yn osodwaith ymdrochol, rhyngweithiol, golau a sain sy’n arwain pob ymwelydd drwy fonolog mewnol am alar, cymuned a bod amser ond yn symud mewn un cyfeiriad. Yn y pen draw, mae’n stori amdanoch chi.

Mae gosodwaith pwerus Andrew Schneider yn eich tynnu chi i mewn i gyfarfod myfyriol a hynod bersonol ag amser, cof a phresenoldeb. Gosodwaith theatraidd rhyngweithiol lle mae’r gynulleidfa yn camu i mewn i dywyllwch llwyr ac yn dod yn ganolbwynt cytser sy’n symud. Dan arweiniad adroddwr cudd, mae cyfranogwyr yn teithio o amddifadedd synhwyraidd llwyr i fatrics wedi’i raglennu’n union o bron i 4,000 o oleuadau LED adweitheddol a seinwedd 496 o sianeli. Mae’r gwaith yn tynnu ymwelwyr i mewn i ffocws manwl o’r presennol, gan olrhain pob penderfyniad maen nhw wedi’i wneud sydd wedi arwain at yr union eiliad hwnnw. Gwnaeth y pwyllgor dewis ganmol ei ddull hynod wreiddiol o adrodd straeon gofodol, celfgarwch technegol manwl a’r cyflymder meistrolgar sy’n gwahodd cynulleidfaoedd i fyfyrio ar sut rydyn ni’n treulio ein hamser a’r ystyr rydyn ni’n ei ddarganfod mewn gweithredoedd pob dydd.

Yn rhannol yn fyfyrdod, yn rhannol yn archwiliad, mae’r uniad yma o dechnoleg a theatr yn gyfle prin i ymgolli eich hun yn y sêr.

“Mae’r gwaith rwy’n ei wneud yn dechnegol iawn, ond nid y dechnoleg sy’n bwysig. Mae gen i fwy o ddiddordeb yn y defnydd o’r dechnoleg a sut y gall ddod â ni’n agosach at ein gilydd, ein hysgwyd ni rhag y synthetig a chynnig profiad go iawn i ymwybyddiaeth pob aelod o’r gynulleidfa, yn hytrach na gwylio rhywbeth “draw fynna”. Mae gen i ddiddordeb mewn sut y gall creu profiadau ystyrlon ar sail amser arwain at ryngweithio mwy ystyrlon rhwng pobl.” – Andrew Schneider