Mae tîm cymunedol Canolfan Mileniwm Cymru yn ymdrechu i wneud yn siŵr bod y rhai sydd wedi’u hymyleiddio fwyaf mewn cymdeithas yn cael cyfle i fod yn greadigol yn ein gofodau, boed hynny’n arwain digwyddiadau, yn arddangos gweithiau celf neu’n cynnal gweithdai. 

Dros y blynyddoedd diwethaf rydyn ni wedi cynnal cyfres o alwadau sy'n talu pobl i wneud nifer o'r pethau yma. Mae pawb sy’n gwneud cais yn cael cyfle i bleidleisio ar bob galwad er mwyn gwneud yn siŵr bod y rhai a gaiff eu dewis yn cael eu dewis yn ddemocrataidd a heb ofn beirniadaeth. 

Rydyn ni’n teimlo ei bod yn bwysig arddangos yr holl ddoniau gwych yn ein cymuned, i flaenoriaethu’r rhai sy’n cael y lleiaf o’r sylw gan greu gofod diogel lle mae croeso i bawb a phawb yn cael eu dathlu.  

Dyma rai o’n galwadau yn y gorffennol:

Galwad am Gelf Gyhoeddus: Gaeaf | Canolfan Mileniwm Cymru

Eleni, rydyn ni wedi penderfynu gwneud ychydig o newid ac rydyn ni’n cynnig cyfle i grwpiau ac unigolion ddod i gwrdd â'r tîm naill ai ar-lein neu wyneb yn wyneb fel y gallwn eich cefnogi i ddatblygu eich syniad a’i ddychmygu yn y gofod. Byddwn hefyd yn cynnal digwyddiadau pleidleisio wyneb yn wyneb (gallwn gefnogi presenoldeb ar-lein ar gyfer y rhai na allant ddod i’r digwyddiad) fel bod modd i bob syniad gael ei gyflwyno ar y diwrnod a chyfle i fwrw pleidlais. 

Yn yr alwad yma rydyn ni’n canolbwyntio ar weithdai, un arddangosfa ac un dathliad diwylliannol. Byddwn yn cynnal galwadau pellach ar gyfer tair arddangosfa arall yn Ffwrnais, dathliadau diwylliannol ychwanegol – gan gynnwys un ar 30 Tachwedd i ddathlu Alban Arthan – a nifer o rai eraill. 

Os oes gennych syniad penodol ac nad oes angen cefnogaeth arnoch, anfonwch unrhyw ddolenni at eich gwaith ac un sleid PowerPoint yn egluro eich syniad/cynnig a byddwn yn archebu lle i chi ar gyfer y digwyddiad pleidleisio a fydd yn digwydd ar 30 Ebrill 2025.

Bydd y digwyddiad pleidleisio yn cael ei gynnal yn Cabaret lle byddwn yn cyflwyno eich sleid i’r grŵp, ac mae croeso i chi ddweud ychydig eiriau cyn i’r bleidlais gael ei chynnal. Os na allwch ddod i’r digwyddiad gallwn dderbyn eich pleidleisiau drwy e-bost. Mae’r model democrataidd yma wedi’i gynllunio dros nifer o flynyddoedd er mwyn gwneud yn siŵr bod pobl yn gallu perchnogi’r broses, yn ogystal â bod â chyfrifoldeb a rennir a’u bod yn cael eu cefnogi gan ddulliau democrataidd sy’n hygyrch ac yn dryloyw. I gael rhagor o wybodaeth, ewch i wefan Shared Future - Cyllidebu Cyfranogol

Ar gyfer pob comisiwn, rydyn ni’n croesawu ceisiadau gan artistiaid, unigolion, grwpiau cymunedol a sefydliadau celfyddydol yng Nghymru neu o Gymru.