Mae Canolfan Mileniwm Cymru yn hyrwyddo artistiaid, ac rydym yn ceisio meithrin ac arddangos talent greadigol yng Nghymru trwy ystod o fentrau a rhaglenni. Un o'r ffyrdd hyn yw darparu gofod creadigol a hyfforddiant am ddim i bobl ifanc, fel y gallant ddatblygu sgiliau a hyder newydd a fydd yn eu helpu i ffynnu fel oedolion. Mae ein rhaglen yn cynnig ystod eang o gyrsiau hyfforddi fel cynhyrchu radio, ffilm, hip hop, actio, gwneud gwisgoedd ac ysgrifennu sgrin.
Trwy ymgynghori â phobl ifanc a'r diwydiannau creadigol, rydym wedi canfod bod deallusrwydd artiffisial a thechnolegau newydd yn faes o ehangu a diddordeb cyflym. Wrth ymateb i'r galw hwn, cawsom gyfle yn ddiweddar i redeg y cwrs llyfrau comig AI lefel mynediad fel prawf gyda dau berson creadigol lleol, gan gyfuno eu dau ddiddordeb – creu llyfrau comig a thechnoleg arloesol.
Mae'r cwrs yn defnyddio AI fel offeryn datblygu a drafftio bras fel y gall cyfranogwyr sydd ag ystod o sgiliau a gallu ddatblygu eu technegau adrodd straeon, gan eu galluogi i gael allfa greadigol beth bynnag fo'u sgiliau creadigol neu eu hanghenion mynediad. Mae'r cwrs yn canolbwyntio ar ysgrifennu, adeiladu straeon a datblygu cymeriad, wrth iddynt ddysgu trwy ymarfer sut i gyfleu eu syniadau a chydweithio â phobl greadigol eraill. Defnyddir AI i helpu troi’r syniadau hynny yn rhywbeth diriaethol i helpu'r person ifanc i ystyried rhyngweithio gweledol, cynllun a deialog yn eu stori. Ni fwriedir i'r gwaith gael ei gyhoeddi yn y ffurf honno, ond gellid ei roi i artist nofel graffig i'w ddehongli ymhellach trwy eu crefft nhw.
Yn y cwrs rydym yn trafod y moeseg sy'n ymwneud ag AI cynhyrchiol, yn enwedig mewn perthynas â hawlfraint a chreu gwaith gwreiddiol. Rydym yn hyderus bod hwn yn ddefnydd cadarnhaol o dechnoleg doreithiog y mae pobl ifanc eisoes yn ei defnyddio i lenwi bylchau yn eu sgiliau creadigol datblygol, gan eu galluogi i fynegi eu hunain mewn ffyrdd na fyddent fel arall yn gallu gwneud hynny. Mae'n ddrwg gennym nad oedd disgrifiad y cwrs yn adlewyrchu ein bwriad yn llawn ac rydym yn cymryd camau i gywiro hyn.
Fel pob sefydliad, o'r celfyddydau creadigol i ofal iechyd, rydym yn ystyried ein dull o ymdrin ag AI, ac rydym yn gwbl ymwybodol o'r effaith y gallai'r dechnoleg hon ei chael mewn nifer o feysydd yn ein sefydliad a'r gymuned artistig – boed yn bositif neu’n negyddol. Rydym yn ddiolchgar am yr holl adborth a dderbyniwyd dros y dyddiau diwethaf, a fydd yn ein helpu i'n hysbysu wrth i ni ystyried ein cynlluniau yn y dyfodol yn ofalus. Rydym hefyd yn bwriadu cynnig cwrs darlunio nofel graffig yn fuan iawn i roi cyfle i bobl ifanc ddatblygu sgiliau yn y maes creadigol iawn hwn.