Fel canolfan fawr sy’n croesawu 1.8 miliwn o ymwelwyr bob blwyddyn, sy’n gwasanaethu fel campws diwylliannol ac sy’n gartref i nifer o sefydliadau eraill, rydyn ni’n cydnabod bod ein gweithrediadau a’n gweithgarwch yn cael effaith ar yr amgylchfyd.
Rydyn ni wedi ymrwymo i leihau ein hallyriadau a blaenoriaethu adnoddau ar draws ein sefydliad, er mwyn cyrraedd ein targed o fod yn sefydliad sero net erbyn 2035. Mae pob dewis cynaliadwy yr ydym ni’n ei wneud, o gwpanau bioddiraddadwy i'w ffordd rydyn ni’n llwyfannu ein sioeau, yn ein helpu ni i leihau ein hôl troed amgylcheddol.
Ein hymrwymiadau:
- Lleihau ein hallyriadau carbon
- Lleihau gwastraff drwy ail ddefnyddio ac ailgylchu
- Gweithio tuag at safonau Llyfr Gwyrdd y Theatr
- Cyflawni ISO14001, safon ryngwladol ar gyfer systemau rheoli amgylcheddol
- Gwneud dewisiadau gwyrdd bob dydd lle bynnag fo’n bosib
Llyfr Gwyrdd y Theatr
Rydyn ni’n defnyddio safonau Llyfr Gwydd y Theatr fel pecyn cymorth o arfer orau. Ar gyfer Nye, fe weithion ochr wrth ochr â’n cyd-gynhyrchwyr, National Theatre i roi Safonau Llyfr Gwyrdd y Theatr ar waith, er mwyn lleihau ein heffaith amgylcheddol. Lle bynnag fo’n bosib fe ddefnyddion ni offer oedd gyda ni’n barod, gan leihau’r angen am ddeunyddiau newydd, a’r angen am brynu neu hurio.
Fe gyflawnodd hyn ganrannau cynaliadwyedd/ailddefnyddio o:
- Golygfeydd: 66%
- Propiau: 64%
- Gwisgoedd: 76%
Ailgylchu
Rydyn ni’n lleihau ar wastraff drwy ddefnyddio cwpanau bioddiraddadwy a drwy ailgylchu gwastraff bwyd ein cegin. Gweinir holl ddiodydd ein bar mewn cwpanau plastig amldro sydd hefyd yn gwbl ailgylchadwy, ac rydyn ni wedi symud i weini diodydd o ganiau lle bynnag fo’n bosib, gan eu bod yn defnyddio llai o ynni i'w hailgylchu na gwydr
Mae’r defnydd a ddefnyddir yn Ffwrnais, ein caffi-bar, wedi’i greu o 200kg o blastig a ailgylchwyd, ac mae 70% o’r dodrefn yn ein swyddfeydd newydd wedi’i ailgylchu a’i uwchgylchu.
Erbyn 2030 ein nod yw derbyn statws Rhydd o Blastig ac ailgylchu ar raddfa o 80%.
Ynni
Yn ystod 2021, gan gydweithio â Joju Solar, fe osodwyd 720 o baneli solar ar ein to am y tro cyntaf, gan arbed mwy na 50 tunnell o garbon bob blwyddyn. Mae’r pŵer solar rydyn ni’n ei gynhyrchu cyfartal i oddeutu 10% o’r ynni trydanol rydyn ni’n ei ddefnyddio bob blwyddyn (yn seiliedig ar ffigyrau cyn COVID o 2019) ac mae’r cynhyrchiad blynyddol o 192,922 kWh yn fwy na digon i bweru gweithgareddau llwyfan Theatr Donald Gordon, ein theatr sydd â 1,900 o seddi, bob blwyddyn dros y 25 mlynedd nesaf, gan olygu bod gennym ni’r llwyfan cyntaf yn y DU sy’n cael ei bweru gan ynni solar. Darganfyddwch fwy am osod ein paneli solar.
Rydyn ni wedi newid ein System Rheoli Adeilad, gan ein caniatáu ni i gael rheolaeth ragweithiol o’n hynni, ac rydyn ni’n caffael ein trydan a nwy am well bris na gwerth marchnadol, ac yn monitro’n defnydd yn ofalus drwy gydol y flwyddyn.
Rydyn ni’n gosod rheolwyr gweithredol i ddiffodd goleuadau / troi goleuadau ymlaen, er mwyn arbed ynni, rydyn ni’n newid hen oleuadau’n barhaus gyda fersiynau sy’n fwy effeithlon o ran ynni, megis LED, ac mae’n rhaid bod gan unrhyw offer newydd well gyfraddiad ynni na’r hen offer, gan olygu ein bod ni’n gwella ar ein defnydd o ynni’n barhaus.
Rydyn ni’n falch o gefnogi Rhwydwaith Wres Ardal Caerdydd Werddach, yr ydym yn gobeithio ymuno â hi yn ystod 2024.
Drwy uwchraddio ein goleuadau, system gwresogi a Systemau Rheoli Adeilad yn gyson, rydyn ni wedi lleihau ein defnydd o ynni dros amser ac yn ddiweddar rydyn ni wedi cael sgôr A o 23 ar gyfer ein Tystysgrif Ynni i'w Harddangos.
Lleihau ar ein defnydd o bapur
Bellach mae 98% o’n tocynnau yn ddigidol, ac mae ein haelodau’n derbyn cardiau aelodaeth digidol. Ers y pandemig nid ydym yn cynhyrchu rhaglen bapur, rydym yn canolbwyntio ar farchnata digidol.
Gwobrau a llwyddiannau
Rydyn ni wrth ein boddau ein bod wedi ennill Gwobr Effaith IWFM ar gyfer Gweithredu Cadarnhaol ar yr Hinsawdd, 2023.
Dyfarnwyd Gwobr y Frenhines am Gynaliadwyedd i ni yn 2016, ac mae ein gwaith cynaliadwyedd yn parhau i ddilyn y meincnod hwn. Rydym hefyd wedi derbyn Tystysgrif Ynni Arddangos B a ystyrir yn wobr ragorol ar gyfer adeiladau cyhoeddus.
Polisi Amgylcheddol
Credwn fod cysylltiad agos rhwng diogelwch a lles ein gweithwyr a’r cyhoedd a stiwardiaeth amgylcheddol. Fel y cyfryw mae ein Polisi Amgylcheddol yn cynnwys cyfeiriadau at iechyd a diogelwch yn ogystal â'r amgylchedd. Mae'n seiliedig ar egwyddorion gwelliant parhaus, cydymffurfio â'r holl gyfreithiau a rheoliadau perthnasol ac atal llygredd.
Rydyn ni’n edrych yn barhaol am ffyrdd o wella ac yn gobeithio y bydd mwy gyda ni i'w rannu gyda chi dros y misoedd a’r blynyddoedd i ddod.
“Fel adeilad eiconig ym mhrifddinas Cymru, mae’n bwysig i ni ein bod ni’n hyrwyddo ein cymwysterau cynaliadwy ac yn dangos ein hymrwymiad i leihau ein hôl troed carbon... Mae defnyddio dull ataliol wrth fynd i’r afael â phryderon amgylcheddol yn hollbwysig i Ganolfan Mileniwm Cymru, gan sicrhau ein hymrwymiad parhaus i greu rhagolwg glanach a gwyrddach ar gyfer cenedlaethau’r dyfodol yng Nghymru.”
David Bonney, ein Rheolwr Gwarchod Adeiladau a Pheirianneg