Camwch i mewn i’n gofod blaen y tŷ newydd, sef Ffwrnais, a byddwch chi’n ymlacio ymhlith ein clustogau prydferth. Cafodd y dyluniadau trawiadol yma eu creu yn arbennig ar gyfer ein lolfa a bar newydd gan y dylunydd a gwehydd Llio James.
Gwnaethom ni ymweld â Llio yn ei stiwdio yn Y Sblot, a rhannodd hi ei hysbrydoliaeth ar gyfer ein clustogau, y broses o ddylunio a’i hymateb i’w gweld nhw yn eu lle yng nghanolfan gelfyddydau genedlaethol Cymru.
Mae’r gwaith a welir yn Ffwrnais yn gorff newydd o waith a ddyluniwyd yn benodol ar gyfer Canolfan Mileniwm Cymru. Wedi’i hysbrydoli gan faneri signalau morwrol, canolbwyntiodd Llio ar faneri sy’n cynrychioli CMC (Canolfan Mileniwm Cymru), WMC (Wales Millennium Centre) a CF (sef cofrestriad cychod pysgota Bae Caerdydd). Yn adnabyddus am ei onglau a siapiau geometrig llym a chyferbyniol, mae’r ffabrig wedi cael ei ddefnyddio ar gyfer clustogau mewn palet o liw cyfoes a ffres. Mae’r gwaith hefyd wedi’i adlewyrchu mewn darnau o gelf gan Llio a welir o gwmpas yr adeilad.
![](https://res.cloudinary.com/wales-millennium-centre/image/upload/c_fill,f_auto,g_auto,h_300,q_auto:eco,w_500/DSCF0828-HDR.jpg)
Mae’r darnau wal wedi’u hysbrydoli gan ddyluniadau brethyn Cymreig traddodiadol gan ddefnyddio palet lliw ein hadeilad, gan dalu sylw arbennig i’r to copr ocsidiedig a’r waliau llechi.
![](https://res.cloudinary.com/wales-millennium-centre/image/upload/c_fill,f_auto,g_auto,h_300,q_auto:eco,w_500/Llio_James.jpg)
Graddiodd Llio James, sydd yn wreiddiol o Dal-y-bont, Ceredigion, o Ysgol Gelf Manceinion (2009) mewn gwehyddu, ac mae ganddi radd meistr mewn Dylunio: Ffasiwn a Thecstiliau o Brifysgol Bath Spa. Ers hynny mae Llio wedi gweithio o fewn y diwydiant tecstiliau yn Efrog Newydd, yr Alban, Lloegr a Chymru. Mae bellach yn gweithio o’i stiwdio yng Nghaerdydd ac yn defnyddio gwŷdd dobi traddodiadol. Mae’n dylunio’r brethyn yn y stiwdio a chaiff ei gynhyrchu mewn melinau lleol yng Nghymru a Lloegr.
Gellir gweld gwaith Llio ar-lein yn www.lliojames.com