Yn rhannol act clownio ac yn rhannol gelfyddyd perfformio, mae’r deimladwy o ddoniol Mariposa Bop wedi bod yn dod â naratif cymeriadau’n fyw drwy neo-stripio ers 2014.

Hi yw cynhyrchydd a churadur yr Apothecary Cabaret ac mae’n aelod gweithgar o gwmni bwrlésg ac adloniant y Scarlet Vixens. Mae Bop yn adnabyddus fel artist perfformio bwrlésg amryddawn a chreadigol sydd â repertoire helaeth, fel cyflwynydd ac MC, ac fel perfformwraig ryngweithiol iawn sy’n ddiffuant yn ei hawydd i wneud i gynulleidfa gymeradwyo, chwerthin a meddwl.

Cyflwynydd, artist bwrlésg a brenhines ddrag comedi wleidyddol ryngwladol lwyddiannus yw Lilly SnatchDragon. Gyda’i hymdriniaeth o’r ffordd mae’r Gorllewin yn ystrydebu merched o Dde-ddwyrain Asia, enillodd wobr y Newydd-ddyfodiad Gorau yng Ngwobrau Cabaret Llundain yn 2015.

Mae wedi bod yn rhestr deg uchaf ‘Perfformwyr Bwrlésg Mwyaf Dylanwadol Prydain’ ers 2015, gan gynnwys rhif 1 yn 2017, ac ar hyn o bryd mae’n rhif 37 yn y byd ac yn rhif 4 yng ngwledydd Prydain.

Dawnswraig broffesiynol a dawnswraig sodlau yw Geo Collins, sydd wrth ei bodd yn addysgu ac yn perfformio. Fel dawnswraig broffesiynol, coreograffydd a sylfaenydd cwmni Heels Empowerment, mae wedi llwyddo i ddatblygu cymuned gyffrous dros y pedair blynedd diwethaf.

Mae Geo’n cynnal cannoedd o ddosbarthiadau, gweithdai a digwyddiadau ar gyfer dawnswyr ar bob lefel, a’r hyn sy’n ei gyrru yw ei hangerdd dros greu amgylchedd hwyliog, cynhwysol a diogel i’w chleientiaid i gofleidio eu hochr synhwyraidd a thanio eu hyder! Mae Geo hefyd yn defnyddio ei llwyfan er daioni, gan roi’n ôl i elusennau fel Cymorth i Ferched Cymru a Breast Cancer Now.

Yn glam yn aml, a bob amser yn hurt – mae Stephanie, neu FooFooLaBelle, wedi bod yn llwyddiant byd-eang, yn carlamu rownd y byd ers dros 30 mlynedd! Mae’n ddawnswraig, yn gantores, yn goreograffydd, yn gynhyrchydd, yn fam ac yn berchennog busnes, a hi oedd sefydlydd Clwb Cabaret Caerdydd yn 2007. Mae wedi cynhyrchu dros 250 o sioeau ac wedi dysgu miloedd o ddosbarthiadau a gweithdai lle mae croeso i berfformwyr o bob oedran a phrofiad.

Mae hi’n creu’n gyson, iddi hi ei hunan ac i deulu Clwb Cabaret Caerdydd. Yn adnabyddus am ei champrwydd eithafol, bwrlésg doniol a chwerthinllyd, a pherfformiadau canu a thaflu. Gwyliwch allan am ei sioeau theatr a’i phrosiectau unigol.